Messi gjithnjë e më pranë City-it, zbulohet mënyra si mund të arrihet transferimi

“El Mundo Deportivo” ka hedhur dritë mbi situatën aktuale të Lionel Messit, duke përdorur edhe burime të ndryshime si pranë futbollistit, ashtu edhe pranë klubit, ndërsa sqaron që në fillim se një ditë e rëndësishme për palët do të jetë e mërkura.

Babai i Messit, Jorge do të mbërrijë në Katalunjë dhe do të takohet me presidentin Josep Bartomeu, të cilit do t’i kërkojë një largim “pa shumë dhimbje” dhe me marrëveshje të 6 herë fituesit të Topit të Artë. Megjithatë numri një i Barcelonës është i bindur të mos lirojë rrugë dhe i nevrikosur edhe më shumë me hapat që ka ndërmarrë Messi deri tani, e ka bërë të qartë se argjentinasi mund të largohet vetëm nëse paguhet shifra e parashikuar në klauzolë.

Po sipas medias prestigjoze spanjolle, Messi e ka gjetur tashmë skuadrën e tij të re, që është pikërisht Manchester City, pasi është joshur nga ideja për të punuar sërish me Pep Guardiolën, trajner me të cilin ka fituar gjithçka te Barcelona. Momentalisht “El Pulce” pretendon se klauzola për prishjen e kontratës një vit para afatit, pa paguar asnjë dëmshpërblim është ende e vlefshme, ndaj edhe bëri kërkesën zyrtare në klub me “burofax”, por nuk ndajnë të njëjtin interpretim Barcelona dhe La Liga.

Këta të fundit e kanë bërë të qartë interpretimin e tyre mbi kontratën, sipas të cilës është firmosur e zezë mbi të bardhë se pas datës 10 qershor, lojtari mund të largohet vetëm nëse paguhet një dëmshpërblim prej 700 milionë eurosh. Yllit argjentinas i është ofruar një pagë prej 50 milionë eurosh neto në sezon dhe një bonus firme prej 250 milionë eurosh, shifër të cilën do ta përfitojë të plotë vetëm nëse do të jetë nevoja për të paguar edhe te Barcelona.