Messi i barazoi rekordin e golave, reagon Pele: Të admiroj!

Lionel Messi me golin që realizoi me kokë në sfidën mes Barcelonës dhe Valencias, barazoi rekordin e legjendës braziliane Pele për sa i përket numrit të golave të shënuar me një klub të vetëm plot 643.

Për këtë arritje të yllit argjentinas nuk mund të mungonin as përgëzimet nga vetë Pele. Në një postim në Instagram, legjenda braziliane përgëzon Leon dhe i shpreh admirimin e tij argjentinasit.

“Kur zemra vërshon nga dashuria, është e vështirë ta ndryshosh rrugën tënde. Ashtu si ti, unë e di se si është të duash të veshësh të njëjtën fanellë çdo ditë. Ashtu si ti, unë e di se nuk ka asgjë më të mirë se vendi ku ne ndihemi si në shtëpi.

Urime për rekordin tënd historik, Lionel, por mbi të gjitha, urime për karrierën tënde të bukur te Barcelona! Histori si e jona, për të dashur të njëjtin klub për kaq gjatë, për fat të keq do të jenë gjithnjë e më të rralla në futboll. Të admiroj shumë”, shkruan Pele.