Messi nuk mjafton, Barcelona turpërohet nga Levante për 7 minuta (VIDEO)

Levante i shkakton humbjen e tretë sezonale Barcelonës, me anë të një përmbysje spektakolare, të bërë vetëm në harkun e 7 minutave. Skuadra e drejtuar nga Paco Lopez triumfoi në shifrat 3-1 në një duel që dhuroi shumë emocione.

Lionel Messi zhbllokoi rezultatin në fundin e pjesës së parë me një gol të shënuar nga pika e bardhë, pas një penalltie të fituar nga Semedo.  Vendasit kanë shënuar 3 gola në harkun e 7 minutave, duke i dhënë një goditje të rëndë ekipit të Valverdes në pjesën e dytë. Campagna barazoi në minutën e 61-të, ndërkohë që më pas Mayoral realizoi një gol të bukur në hyrje të zonës.

Në minutën e 68-të, Radoja shënoi golin e tretë, duke shokuar blaugranët që ishin në “gjumë” total. Messi shënoi golin e dytë, por që do të anulohej më pas me VAR, pasi Griezmann ishte në pozicion jashtë loje. /R.Lika-Koha Jone/