Milani prenoton një holandez për në verë dhe “blindon” Theo Hernandez

Milani është shumë aktive në merkaton e transferimeve, teksa ka nisur që të mendojë për të ardhmen. Maldini dhe Massara nuk kanë ndërmend të heqin dorë nga Sven Botman, që mbetet objektivi kryesor i Milanit për të përforcuar mbrojtjen.

Marrëveshja me mbrojtësin holandez, duket shumë pranë, pasi agjenti i lojtarit Nikkie Bruinenberg ishte dje i pranishëm në “San Siro” për të parë ndeshjen kundër Lazios, ndërsa sot ka takuar drejtuesit kuqezi në “Casa Milan”.

Te Kuqezinjtë ndërkohë nuk ka asnjë dyshim për të ardhmen e Theo Hernandez, i cili është në detajet e fundit për rinovimin.  Pritet vetëm zyrtarizimi i kontratës së re të mbrojtësit francez, që do të rinovojë deri në 30 qershor të vitit 2026 dhe do të përfitojë 4.5 milionë euro neto në vit plus bonuse.