Milani shpëton sërish nga humbja, këtë herë ndaj Fiorentinës

Milani i shpëtoi humbjes në minutat e fundit në transfertën e vështirë ndaj Fiorentinës. Sfida e vlefshme për javën e 20-të të Serie A, e para e fazës së dytë të kampionatit, u mbyll në barazim 1-1 në stadiumin “Franchi”.

Në pjesën e parë ishin vendasit ata që ushtruan më shumë presion, duke ndërtuar lojën kryesisht nga krahu i majtë. Gudmundsson dhe Gosens krijuan vazhdimisht rrezik me krosime në zonë, ndërsa Milani u shfaq në disa momente në vështirësi. Megjithatë, kuqezinjtë patën dy raste të pastra për të kaluar në avantazh, falë punës së mirë të Fullkrug, i cili shërbeu dy herë për Pulisic, por amerikani nuk arriti të konkretizonte në asnjërin rast.

Pas pushimit, Fiorentina rriti edhe më shumë ritmin dhe gjeti golin e avantazhit në minutën e 66-të. Nga një goditje këndi e ekzekutuar në mënyrë perfekte nga Gudmundsson, Comuzzo devijoi saktë me kokë, duke mposhtur portierin kundërshtar.

Trajneri Allegri reagoi menjëherë duke hedhur në fushë edhe Nkunku, lëvizje që rezultoi vendimtare. Ish-sulmuesi i Chelseat shmangu humbjen për Milanin në minutën e 90-të, duke realizuar me një goditje të fortë me të djathtën pas asistit të Fofana, për rezultatin përfundimtar 1-1.

Emocionet nuk munguan as në shtesë, ku në minutën e 97-të Fiorentina ishte shumë pranë fitores, por goditja e Brescianini u ndal nga traversa.