Modric: Milanin e kam ndjekur që fëmijë, me Taren u takova në Kroaci

Luka Modric ka folur për herë të parë si lojtar i Milanit në një intervistë për “Milan TV”, duke treguar emocionet dhe arsyet që e çuan të zgjedhë klubin kuqezi pas një karriere legjendare me Real Madrid. Mesfushori kroat, që në shtator mbush 40 vjeç, e konsideron këtë kapitull të ri si një zgjedhje të natyrshme dhe emocionale.

“Që fëmijë ndiqja shumë Serie A-n dhe Milani ishte skuadra ime e preferuar, sidomos për shkak të idhullit tim, Zvonimir Boban,” u shpreh Modric. “Kisha oferta të tjera, por sapo më telefonoi Milani, për mua ishte e qartë: e doja që nga momenti i parë.”

Mesfushori zbuloi edhe një detaj që e ka bindur përfundimisht: “Drejtori sportiv Tare erdhi në Kroaci për të më paraqitur projektin. Ky gjest më tregoi sa shumë e dëshironin të më kishin pjesë të ekipit. Milani është një nga klubet më të mëdha në Europë, nuk mund të kënaqet me mesataren – duhet të luftojmë për trofe dhe të jemi mes më të mirëve në botë.”

Pavarësisht se ka fituar gjithçka, përfshirë Topin e Artë, Modric theksoi se dëshira për të fituar është ende e gjallë: “Do të sjell urinë time për fitore, do të ndihmoj shokët e skuadrës në çdo aspekt dhe do të punoj fort për të fituar vendin tim në fushë. Asgjë nuk është e lehtë, duhet përkushtim dhe luftë. Gjëja më e rëndësishme për mua është dashuria për futbollin, dhe kjo më mbush ende. E ndjej ende zjarrin brenda meje. Kam ende dëshirë dhe uri për të fituar.”