Moggi: Mashtrimi me bilancet në Seria A ekziston prej 15 vitesh, s’ka shanse që Juvja …

Hetimi për mashtrime me bilancet në Itali, që është përqendruar kryesisht te Juventusi, por prek shumë klube të Serisë A, nuk është një skandal i kohëve të fundit. Luciano Moggi, ish-drejtori i përgjithshëm i klubit bardhezi, që u përjashtua përjetë nga futbolli, u shpreh se se rritja fiktive e të ardhurave është një sistem i krijuar përpara 15 vjetëve.

“Kur rrit bilancin në mënyrë fiktive, thjesht shtyn një borxh aktual për disa vjet. Por, më pas e sheh veten në një situatë ku gjendesh me 200-300 milionë euro borxhe. Ankesat se Covid ka goditur klubet janë qesharake. Kur ke bilance negative me humbjen e qindra milionave, atëherë problemi nuk lidhet me pandeminë.

Kur ishim te Juventusi, na akuzuan për rritjen fiktive të bilancit me 5 milionë euro, pasi blemë Moretti nga Fiorentina. Juve synonte të ndihmonte klubin tjetër, që ishte në vështirësi financiare. Hetimi zgjati dy vjet: unë, Bettega e Giraudo akuzoheshim si nëpunës të pabesë. Me aq sa unë di, është e pamundur që një skuadër e kuotuar në bursë të falsifikojë bilancet financiare”, deklaroi Moggi.