Mori ftesë nga Kombëtarja, portieri Kastrati: E prisja, nder për mua

Elhan Kastrati është grumbulluar për herë të parë me kombëtaren Shqiptare. Portieri i Citadellës u shpreh shumë i lumtur për ftesën e marrë nga përfaqësuesja “kuqezi” dhe duke folur për “Il Mattino di Padova”, 25-vjeçari shtoi se e priste këtë moment.

“Jam i lumtur, është nder për mua. A e prisja thirrjen? Më shumë se çdo gjë tjetër e shpresoja. Në kombëtaret kam bërë të gjithë procesin e ekipeve të të rinjve që nga nën 16 deri te grupmosha e 21-vjeçarëve.

Një herë ne 2018-ën jam thirrur në momentin e fundit, në rast urgjence në ekipin e të rriturve, pas dëmtimit të një prej portierëve të tjerë, por kjo është thirrja e parë zyrtare”, theksoi ai.

Përveç Kastratit ftesë nga Kombëtarja për herë të parë kanë marrë edhe Kristjan Asllani i Empolit dhe Adrian Bajrami i Benficës.