Ndeshja e Champions League, Kairat-Olympiacos do të luhet në temperaturë ekstreme -29 gradë celsius

Sporti E Martë, 9 Dhjetor 2025 10:27

Olympiacos mbërriti dje në Kazakistan për ndeshjen e radhës në Champions League kundër skuadrës vendase të Kairat. Sfida do të luhet në Astana, në orën 20:30 lokale (16:30 sipas orës sonë), por vëmendjen kryesore nuk e tërheq orari, por temperaturat ekstreme që priten në kryeqytetin kazak.

Sipas parashikimeve, termometri mund të zbresë deri në -21 gradë, ndërsa me erën e fortë nga veriu temperatura e ndjeshme mund të shkojë deri në -29 gradë. Megjithatë, ndeshja nuk rrezikohet, pasi “QJ Arena” është e pajisur me sistem ngrohjeje dhe çati tërheqëse, e cila është mbyllur gjatë stërvitjeve, duke garantuar një terren loje në kushte optimale.

Kjo konsiderohet një nga ndeshjet më të ftohta të luajtura ndonjëherë në Champions League. Edhe sezonin e kaluar Chelsea u përball me kushte të ngjashme kur luajti në Astana për Conference League.

UEFA lejon pjesëmarrjen e klubeve nga Kazakistani për shkak të pjesës territoriale të vendit që shtrihet në kontinentin evropian. Ndërkohë, pamjet e publikuara nga Olympiacos tregojnë se fusha është në gjendje të përsosur, edhe pse jashtë temperatura është tepër e ulët.

Pritet që ndeshja të zhvillohet normalisht, ndërsa skuadra greke kërkon një rezultat pozitiv ndaj një rivali të rrezikshëm dhe kushteve klimaterike jashtëzakonisht të vështira. /Koha Jonë/