Ndihmësi i Rejës: Pranuam me kënaqësi uljen e pagave, po punojmë për konsolidimin e ekipit

Ish-lojtari i Juventusit, Sergio Porrini, tashmë pjesë e stafit teknik të Kombëtares Shqiptare, ndihmës i Edoardo Reja, foli sot për “Fan Zone” në lidhje me situatën e krijuar nga koronavirusi.

“Tani situata është më e mirë. Ka qenë një periudhë e vështirë, me shumë viktima. Fatmirësisht po ulet numri i viktimave. Sa i takon futbollit, duke një situatë më e mirë. Pas 3-4 javësh njerëzit pritet të kenë më shumë liri dhe të nisin me aktivitetet sportive.

Flas me trajnerin Reja dhe me lojtarët, pasi duam ta dimë gjendjen e lojtarëve. Ata kanë marrë udhëzime nga klubet që të stërviten. Po punojnë për të mbajtur gjendjen fizike, që të jenë gati për nisjen e aktivitetit. Për ne është pak e vështirë të organizohemi. Kur nuk ka kampionate, nuk është se kemi çfarë të bëjmë. Normalisht kemi bërë një program.

Ulja e pagave? Të gjithëve na është ulur paga. Reja na ka telefonuar dhe e kemi pranuar me kënaqësi. Të gjithë ishim gati, pasi e dimë situatën dhe kjo është më se normale.

Prurjet në Kombëtare? Po punojmë për të konsoliduar skuadrën. Kemi afruar lojtarë si Selahi dhe Kamberi, apo edhe emra si Bare e Kumbulla”, u shpreh Porrini.