Nga 0-2 në 2-2, Napoli shmang humbjen ndaj Veronës

Java e 19-të e kampionatit sjell një ndalesë të papritur për Napolin, që në transfertë ndaj Veronës shmang humbjen vetëm në minutat e fundit, 2-2. Skuadra e drejtuar nga Antonio Conte rrezikon të përsërisë skenarin e hidhur me të cilin ishte hapur sezoni i kaluar, duke zhvilluar një pjesë të parë për t’u harruar.

Të zotët e shtëpisë e nisin fuqishëm dhe në minutën e 16-të kalojnë në avantazh me një realizim spektakolar: Frese shënon me një goditje elegante me thembër, duke ngrirë mbrojtjen napolitane. Vetëm pak minuta më vonë, në të 27-ën, Orban dyfishon shifrat nga pika e bardhë, duke e çuar Veronën në epërsi të plotë në fundin e pjesës së parë.

Në fraksionin e dytë, Napoli ndryshon fytyrë. Azzurrët shtojnë presionin dhe në kërkim të përmbysjes arrijnë të shkurtojnë diferencën me golin e McTominay, që rihap ndeshjen. Goli i barazimit vjen dy herë i mohuar nga gjyqtari për pozicion jashtë loje, por insistimi i miqve shpërblehet në minutën e 82-të: kapiteni Di Lorenzo gjen rrjetën dhe vendos ekuilibrin.

Në fund, Verona ka edhe shansin e artë për të marrë tre pikët, por Giovane shpërdoron rastin e pastër përpara portës, duke i falur Napolit një barazim që vlen shumë.