Para ndarjes nga jeta, Commisso: ‘Nuk mund të jem në Firence, por nuk heq dorë nga Fiorentina’

Rocco Commisso, presidenti i Fiorentinës, i cili ndërroi jetë, kishte shprehur në një intervistë të dhënë në dhjetor për “La Nazione” shqetësimet e tij shëndetësore, krahas çështjeve futbollistike dhe ekonomike të klubit. Në atë kohë, Fiorentina ndodhej në fund të renditjes, pa asnjë fitore pas 14 javësh, duke ndryshuar trajnerin dhe drejtorin sportiv, por pa parë reagim nga skuadra, çka ngjallte frikën e një rënieje dramatike në kategori.

Commisso, në krye të klubit që nga viti 2019, nuk kishte mundur të ishte fizikisht në Firence prej kohësh për shkak të problemeve shëndetësore. Ai theksoi se i mungonte kontakti me ekipin dhe me “Viola Park”, por ishte gjithmonë i informuar. “Jam i hidhëruar që nuk mund të jem në Firence për të luftuar siç jam mësuar në situata të vështira, por aktualisht nuk do të mund të bëja një fluturim kaq të gjatë,” kishte thënë ai. Ai mohoi zërat për shitjen e klubit, duke theksuar se ato destabilizonin ambientin dhe se ai nuk kishte hequr dorë kurrë nga asnjë prej sipërmarrjeve të tij, duke përmendur suksesin e Mediacom si shembull.

Presidenti shprehu besim të plotë te drejtuesit dhe trajneri Vanoli, i cili kishte lënë Torinon për Fiorentinën, duke theksuar se të gjithë duhet të punonin së bashku për të shpëtuar klubin nga rënia. Ai gjithashtu përmendi problemin e stadiumit “Franchi”, i cili po penalizonte skuadrën me kapacitet të reduktuar. Në fund, Commisso vlerësoi mbështetjen e tifozëve, por dënoi ashpër ata që kishin kërcënuar lojtarët, duke theksuar se klubi po bashkëpunonte me autoritetet për të ndjekur penalisht autorët e këtyre akteve të turpshme.

Marrë nga La Gazzetta dello Sport