Partizani fiton ndaj Teutës dhe merr vendin e katërt, Vllaznia bën “paqe” me Laçin

Partizani merr një fitore shumë të rëndësishme 3-1 ndaj teutës, dhe shton shanset për pjesëmarrjen në Kupat e Europës për sezonin e ardhshëm. Ndeshja e luajtur këtë të shtunë në “Elbasan Arena” është dominuar nga “Demat”, megjithatë goli i parë u realizua nga “Djemtë e Detit”, të cilët goditën portën e Alban Hoxhës në minutën e 27-të me Ivanovic.

Ky avantazh do të zgjaste deri në minutën e fundin e fraksionit të parë, kur Xhuljano Skuka goditi portën e Qirkos, moment i cili u diskutua edhe si pozicion jashtë loje, por pas verifikimit në VAR goli u quajt i rregullt. Në minutën e 53-të, Bitri shënoi me kokë pas një krosimi nga Kallaku dhe i dhuroi avantazhin ekipit të tij.

Sfida pati një ritëm të lartë, ndërkohë që në fundin e saj Miroslavljev shfrytëzoi daljen nga Porta të Pano Qirkos dhe shënoi golin e tretë për Partizanin. Pas javës së 28-të, Partizani shkon në kuotën 41 pikëve në vend të katër, teksa Teuta qëndron në vend të gjashtë me 32 pikë të grumbulluara.

Nuk ka gola dhe fitues në Vllaznia-Laçi. Dueli i luajtur në “Loro Boriçi” ishte tepër i luftuar dhe plot duele të forta në çdo cep të fushës. Rikthim me barazim për Shpëtim Duron në stolin e kurbinasve, që mbetën në vend të dytë me dy pikë mbi Kukësin ndjekës.