Partizani mundet minimalisht nga Trabzonspori në Turqi (VIDEO)

Partizani ka pësuar një humbje minimale 0-1 në testin e parë miqësor në Turqi, ndaj gjigandëve turqë të Trabzonspor në sfidën e zhvilluar në Antalia. Trajneri Somani e nisi sfidën me formacionin më të mirë të mundshëm teksa aktivizoi që nga minuta e parë, Hoxhën në portë Idrizajn, Bitrin, Bilalin e Trashin në mbrojtjen me 4, Telushin, Romeron dhe Cordeiro në mesfushë ndërsa treshja e sulmit përbëhej nga Çinari, Bardhi e Broën.

Duelin e vendosi një gol i sulmuesit kryesor të Trabzonspor, Sorloth në minutën e 22-të, i cili përfitoi nga një përgjumje në mbrojtjen e kuqe duke mposhtur Hoxhën. Me këtë rezultat u mbyll pjesa e parë ndërkohë në pjesën e dytë të dyja skuadrat zbritën në fushë me të tjera 11-she me dy trajnerët që hodhën në fushë të gjithë lojtarët e stolit. Partizani iu afrua golit të barazimit në disa raste me Joseph Ekuban, Kote, Solomon e Boldor por pa mundur të gjejë rrjetën.

Një humbje minimale për të kuqtë ndaj një kundërshtari të nivelit shumë të lartë, është mëse e pranueshme në debutimin e Sormanit, pasi Partizani prodhoi lojë në këtë sfidë dhe mund të përmirësohet duke filluar që nga miqësorja e ardhshme në Antalia ndaj hungarezëve të Budapest Honved.