Pejiç distancon Kukësin nga rivalët, “ngec” Skënderbeu, Çota “shkund” Vllazninë

Sporti E Diel, 18 Prill 2021 20:25

Tirana i dorëzoi sot kreun Kukësit, në Kategorinë Superiore, pa kaluar as 24 orë. Bardheblutë fituan dje ndeshjen e parë të javës së 20-të, ndaj Flamurtarit, 1-0, me gol të Ndikumana dhe morën përkohësisht kreun e klasifikimit. Por në ndeshjet e sotme, siç pritej, Kukësi fitoi lehtësisht ndaj Elbasanit 3-0 dhe u ngjit i vetëm në krye, madje duke thelluar diferencën në 3 pikë me vendin e dytë, që tashmë mbahet nga kryeqytetasit e drejtuar nga trajneri Gugash Magani. Kjo për faktin se Skënderbeu që ndiqte Kukësin, u ndal në barazim pa gola me Laçin në shtëpi, dhe zbriti në vend të tretë, katër pikë larg kryesuesve. Ndeshja e fundit, e javës së 20-të mes Apolonisë dhe Partizanit, do të luhet pasdite në Fier. Të kuqtë e trajnerit Shpëtim Duro duhet të fitojnë, që të barazohen më Skënderbeun, ndryshe mund të distancohen nga kryesuesit, me shanse më të pakta për titullin kampion.

Teuta – Vllaznia 2-1

Kur duheshin edhe katër minuta nga mbyllja e ndeshjes në “Niko Dovana” të Durrësit, sulmuesi librazhdas i ardhur gjatë merkatos së dimrit nga Elbasani tek Teuta, Mirel Çota, shënoi golin e fitores në favor të “djemve të detit” duke i dhënë tre pikë të çmuara skuadrës vendase. Teuta fitoi ndaj Vllaznisë, 2-1, ndërkohë që golin e parë për vendasit e shënoi një shkodran, Ansi Nika, në 40’. Ky i fundit realizoi me një 11-metërsh që e fitoi vetë, pas një pengimi në zonë. Uruguaiania Soza barazoi shifrat për Vllazninë, në pjesën e dytë, në 69’, pas një gabimi të portierit Osmani, por shkodranët nuk mundën dot ta mbanin barazimin, prej presionit dhe dominimit të lojës nga Teuta, në fund të ndeshjes.

Kukësi -Elbasani 3-0

Kukësi, për shkak të dënimit të stadiumit, priti në “Ymer Zeqiri” pa praninë e tifozëve të vet Elbasanin e vendit të fundit, por ky fakt nuk e penalizoi atë që të seleksiononte fitoren e dytë radhazi për këtë vit dhe të mbajë kreun e klasifikimit. Ndeshja nisi me gol, teksa kroati Pero Pejiç zhbllokoi shifrat që në 3’. Goli i dha më shumë besim ekipit të drejtuar nga Artim Shaqiri, që me të njëjtin lojtar, realizoi edhe dy gola të tjerë, duke fituar lehtësisht 3-0, ndaj Elbasanit. Në 52’ Hysa pason për kroatin shtatëlartë, që mposhti portierin Koçi, për herë të dytë. Pesë minuta para se të mbyllej ndeshja, Pejiç shënon edhe golin e tretë, duke vulosur rezultatin. Sulmuesi kroat marshon me këtë tripletë i sigurtë drejt trofeut personal të “Këpucës së Artë”, teksa ka shënuar 13 gola, ndërsa Kukësi mban vendin e parë, tani i shkëputur nga rivalët, Tirana, Skënderbeu e Partizani. Humbja për Elbasanin, do të thotë se shanset e mbijetesës janë edhe më të pakta.

Skënderbeu-Laçi 0-0

Skënderbeu priti Laçin, në shtëpi, por kampionët në fuqi lanë dy pikë të çmuara pasi nuk shkuan më tepër se barazimi i bardhë pa gola. Skënderbeut i mungonte në këtë ndeshje Peter Olaianka, i pezulluar me katër muaj, ndaj edhe trajneri Mirel Josa aktivizoi nga minuta e parë Sefën e Martins. Skënderbeu rrezikoi disa herë portën në pjesën e parë, por pa gjetur dot rrugën e rrjetës. Sefa shënoi në pjesën e dytë, por gjyqtari e anuloi golin e tij, për shkak të një faulli ndaj portierit Vujadioviç. Sefa humb edhe raste të tjera të pastra para portës laçiane, sikurse edhe Martins e Berisha, ndërkohë që Laçi del më i fituar nga kjo sfidë, me një pikë të artë. Në kushtet e motit, dhe të ftohtit kjo sfidë u zhvillua në prani të një numri të paktë të tifozëve vendas.

Apolonia – Partizani, sot ora 17:00

Apolonia luan një ndeshje vendimtare për mbijetesë, por brenda në shtëpi pret Partizanin, që po ashtu kërkon fitoren për titullin kampion. Apolonia, nën drejtimin e trajnerit Artan Mërgjyshi, synon fitoren e parë të këtij viti, pas humbjes së kaluar me Tiranën, 2-0, sikurse edhe Partizani, pas barazimit 1-1 me Laçin. Me Apoloninë kanë firmosur gjatë dimrit 3 futbollistë, Ribaj, Idrizaj dhe Balaj, të cilët do të jenë që sot në dispozicion të trajnerit Mërgjyshi. Partizanit i mungon sulmuesi kryesor, serbi Raciç, për shkak dëmtimi, por ai do të jetë në stol, për të luajtur ndoshta në pjesën e dytë. Përballja e pasdites, në stadiumin e Fierit, do të mbyllë edhe javën e 20-të në Kategorinë Superiore.

Kategoria Superiore

Java e 19-të/Sot

Kukësi-Elbasani 3-0

Shënues: Pejiç 3′ 54′, 85'

Skënderbeu-Laçi 0-0

Teuta-Vllaznia 2-1

Shënues: Nika 42’, Çota 86’/ Soza 69’

Apolonia-Partizani, ora 17:00

Dje

Tirana-Flamurtari 1-0

Shënues: Ndikumana 85’ (Elbasan Arena)

Klasifikimi