Përmendi emrin e Sukur, komentatori i TRT në Turqi shkarkohet nga puna në pushimin e ndeshjes

Në kanalin televiziv turk “TRT”, komentatori Alper Bakırcıgil u kujtoi shikuesve turq se goli më i shpejtë në një Botëror të futbollit është shënuar nga legjenda turke Hakan Sukur. Një veprim që sipas punëdhënësit të tij nuk duhet ta bënte.

Gjatë pushimit së ndeshjes Marok-Kanada, Bakırcıgil u hoq nga ekrani dhe u zëvendësua nga një koleg. E pas ndeshjes ka marrë njoftimin për shkarkim, shprehet ai vetë në “Twitter”.

“Më pushuan nga TRT-ja, ku punova me krenari për shumë vite, pas ngjarjes që ndodhi sot (e enjte)”, ka shkruar ai.

Hakan Sukur me të vërtetë shënoi golin më të shpejtë në historinë e Kupës së Botës kur, pas vetëm 11 sekondash, ai vendosi Turqinë në avantazh në ndeshjen e Kupës së Botës në 2002. Por që atëherë, Sukur konsiderohet nga qeveria turke si i lidhur me terrorizmin.