Pikante/ Tifozët digjen për ujë, por nuk harrojnë Ballist Morinën. Një “huligan” i bën zbor policisë

* Ultrasit korçarë e pritën me ovacione dhe brohoritje skuadrën e tyre gjatë momentit që po hynin në stadium me autobus. Mbështetja nuk mungoi gjatë gjithë sfidës. Numri i tyre ishte brenda pritshmërive.

* Edhe në këtë përballje shqiptarët nuk e harruan “zakonin” e tyre për t’i lënë gjërat në fund. Ndonëse biletat kishin disa ditë që ishin në shitje, një pjesë e mirë e tyre i bleu ato para nisjes së ndeshjes. Madje, radhë të gjata pati edhe gjatë kohës që sfida kishte startuar.

* Tribuna qendrore dhe ajo ballore ishin të mbushura gati plotësisht, por linin për të dëshiruar ato anësore. Madje, sektori G pas portës jugore nuk u hap fare. Në sektorin e miqve nuk mungon mbështetësit e paktë të Mladës.

* Në tribunën e “Elbasan Arena”-s nuk mungoi as kreu i FSHF-së, Armand Duka, që qëndroi përkrah presidentit të Skënderbeut, Ardian Takaj, si edhe ish-presidentit, Agim Zeqo.

* Në momentin që spikeri po lançonte emrat e lojtarëve, në monitorët e stadiumit dilnin fotot e tyre. Praktikë e rrallë në Shqipëri.

* Skuadra korçare vijoi me besëtytninë e saj e të mosbërit foto përpara takimit. Të njëjtën praktikë ndoqën edhe para dy sezonesh kur u ngjitën deri në grupet e Europa Ligës. Fati edhe kësaj here ishte me ta, por do detyrohen nga UEFA që të bëjnë foton zyrtare në takimin e radhës.

* Para startit të sfidës, kapiteni i korçarëve, Orges Shehi, takoi të gjithë lojtarët për t’u dhënë kurajë përpara takimit.

* Afrikanët Xhejms dhe Nimaga nuk harruan të bëjnë ritualin e tyre të besimit në Zot, për t’u sjellë fat. Zoti ishte me ta!

* Në minutën e 128-të ishin dy topa në fushë, ndërkohë që miqtë po krijonin një aksion të rrezikshëm dhe për pak kaluan në avantazh. Gjyqtari vijoi lojën, edhe pse korçarët patën pretendimet e tyre. Edhe në të 40′ ndodhi e njëjta histori dhe sërish nuk u ndalua loja.

* Gjatë gjithë ndeshjes nuk munguan kontestimet e tifozerisë vendase ndaj vendimeve të gjyqtarëve, të cilat u konsideruan si të dyshimta.

* Duke parë rezultatin në humbje, Daja jep urdhër që treshja e ofensivës, Taku-Muzaka-Shkodra, të dalë në nxehmje që në pjesën e parë.

* Ndonëse temperaturat ishin shumë të larta, në stadium mungoi shërbimi katering dhe sportdashësit nuk kishin mundësi as për t’u freskuar. Shërbim katering kishte vetëm për sektorin VIP.

* Në minutën e 52′ Skënderbeu pretendon për një 11-metërsh, por nuk mendon kështu gjyqtari. Tekniku Daja proteston te gjyqtari i katërt.

* Pasi Skënderbeu kaloi në avantazh 2 me 1 në tribunën VIP e panë të gjithë ndeshjen në këmbë, pasi me sa duket emocionet kishin arritur kulmin. Pothuajse edhe shtesat me penalltitë u panë në këmbë.

* Pas përfundimit të kohës së rregullt, Takaj zbret në fushë dhe flet me skuadrën. Motivimi i njëshit të klubit të kuq e dha efektin, sepse në fund Skënderbeu u kualifikua nëpërmjet ruletës së 11-metërshave.

* Gjatë fundit të ndeshjes, tifozët “kujtohen” edhe për “Ballist” Morinën, i cili është në pritje të ekstradimit në Serbi. I gjithë publiku ka dashur të japë mbështetjen për “njeriun e dronit”.

* Në përfundim të ndeshjes, pas kualifikimit për në fazën e “play Off”, një tifoz nuk e përmbajti veten dhe u fut në fushë. Përpos ndjekjes së stjuartëve dhe të policisë, ia doli të përshkojë të gjithë fushën. Në fund, lodhja bëri të vetën dhe u dorëzua.

* Të gjithë në festë pas penalltive, me lojtarë dhe tifozë që festojnë nëpër fushë dhe tribuna. Festa vazhdoi edhe jashtë stadiumit…/panoramasport