Pioli: Na mungon kualiteti, s’jemi mësuar të kemi një sulmues si Ibrahimovic

Entuziazmi për rikthimin e Ibrahimovic në shtëpinë e Milanit i la vend zhgënjimit pas barazimit 0-0 ndaj Sampdorias. Trajneri Stefano Pili u shpreh se te skuadra e tij mungon kualiteti për të bërë diferencën me kundërshtarët.

“Donim të fitonim për ta rinisur kampionatin më mirë, por mbetëm të zhgënjyer. Kemi dominuar ndeshjen dhe mendoj se kemi bërë mbi 70 pasime në zonën e tyre, por na mungoi kualiteti dhe kur nuk e ke atë precizion teknik në pasime, nuk mund të fitohet ndeshja vetëm duke krijuar mundësi.

Ibrahmovic? Kishte një impakt pozitiv, ai solli karakter, mbështetje dhe prezencë në skuadër. Mendoj se ekipi nuk është mësuar të ketë një lojtar me fizikun e tij në zonë dhe nuk arriti të fuste më tepër krose për të, sidomos në fund të ndeshjes.

Akoma duhet të studiojmë dhe të zhvillohemi për të parë se si do të luajmë me Ibrahimovic. Ibra është një qendërsulmues, do të shohim nëse do ta përdorim të vetëm në sulm, apo me një partner përkrah tij. Ai mund të luajë përkrah Piatek, por duhet balanca dhe karakteristikat e duhura për ta bërë të mundur këtë gjë”, deklaroi Pioli pas ndeshjes.