Pirlo gjen justifikimin: Jemi ekip në ndërtim, na duhet ende kohë!

Gjërat nuk po shkojnë ashtu si mund të kishte shpresuar Andrea Pirlo. Një pikë në Crotone në emergjencë të plotë, tregoi edhe njëherë se problemet te skuadra torineze janë të mëdha.

“Në ndeshjet e fundit kemi mbetur me 10 lojtarë për ndonjë shpërqendrim të tepërt. Jemi një skuadër e re e patëm pak kohë. Të rinjtë po bëjnë eksperiencë në fushë, është normale të paguash diçka.

Kemi ndërtuar një skuadër me kualitet e të re, por jemi ende në ndërtim. Na duhet kohë, por shumë djem kanë nevojë të gabojnë, por nuk patëm kohë ta bënim në ndeshje që nuk kishin rëndësi. Duhet të jetë i aftë ai të gjejë zonën ku jep më mirë gjatë ndeshjes e të krijojë superioritet përpara. Morata? Është një nga 5 lojtarët që qëndroi të punonte me ne gjatë pauzës, ishte më mirë se të tjerët dhe kishte dëshirë të bënte mirë.

E dinim që presioni këtë vit do të ishte shumë i madh. Ka shumë skuadra të kompletuara e do të jetë një betejë e gjatë në kampionat. Po humbasim ndonjë pikë rrugës, por duhet të punojmë që të kthehemi të vrapojmë.

Arthur? Për momentin ka karakteristikat e futbollit spanjoll, luan shkurt, me shumë pasime e pak në thellësi. Po punojmë, nuk bëri keq por duhet përmirësuar në këtë drejtim. Dybala? Është stërvitur pak e duke mbetur me 10 lojtarë nuk ishte ndeshja ideale për ti dhënë minutazh”, deklaroi Pirlo.