Presidenti i UEFA-s shpjegon se përse u përsërit i gjithë shorti i Championsit

Aleksander Ceferin, presidenti i UEFA-s, foli pas Komitetit Ekzekutiv të organit të tij dhe shpjegoi se çfarë ndodhi në shortin e Ligës së Kampionëve ku pati një problem që e bëri të nevojshme përsëritjen e tij.

“Diçka nuk shkonte me softuerin. UEFA kontaktoi ofruesin e saj të softuerit dhe u vendos që i gjithë shorti të përsëritej sepse nuk dihej saktësisht se kur kishte ndodhur gabimi. Vendimi ynë ishte të jemi transparent. Është shumë herët për të folur për pasojat. Ky është një mësim. Është e qartë se ky është një vendim i UEFA-s. Ne ishim të varur nga teknologjia dhe ndoshta duhet të ishim më pak të varur. Na vjen keq për gabimin. Janë dështime që ndodhin. Ato nuk janë dështime njerëzore, por dështime teknologjike.

Presidenti dha detaje edhe për rimodelimin e mundshëm të Fair Play-it financiar: “Kemi folur për strategjinë e Futbollit të Qëndrueshëm 2030. Është krejtësisht ndryshe nga Fair Play. Kemi pasur takime me të gjithë futbollistët dhe gjithashtu me kampionate: Premier League, La Liga dhe Bundesliga. Është diçka që ne duhet ta vlerësojmë ”.