PSG-Bayern pa gola në 45 minutat e para, raste të arta për Neymar dhe Lewandowskin (VIDEO)

Në “Da Luz” fraksioni i parë i finales mes Bayernit dhe PSG u mbyll pa gola. Ndeshja nisi me një ritëm të ulët teksa të dyja skuadrat studiuan lojën e njëra-tjetrës. PSG merr kontrollin e lojës në minutat në vijim, teksa në minutën e 18-të, Neymar i vetëm përballë portierit Neuer, ndalet nga dy pritje fantastike të portierit gjerman.

Reagimi i Bayernit është i menjëhershëm, teksa 4 minuta më pas, Lewandowski rrotullohet në mënyrë spektakolare në zonë dhe më pas e dërgon topin në shtyllën e djathtë. Pak sekonda më pas me një kundërsulm të frikshëm, Di Maria shpërdoron një shans të artë në zonën e gjermanëve.

Bavarezët humbën Boateng në minutën e 25-të, pasi doli i dëmtuar nga fusha e lojës, teksa vendin e tij e zuri Sule. Emocionet shtohen me kalimin e minutave, teksa disa minuta më pas Keylor Navas shpëton për mrekulli portën pas një goditje me kokë të Lewandowskit. Në fundin e pjesës së parë, Mbappe nga një pozicion shumë i favorshëm, brenda zonës, bën më të vështirën, duke ja dhuruar topin Neuer-it.  /R.Lika-Koha Jone/