Real Madrid mbyll çatinë e Bernabeut për supersfidën ndaj Bayernit

Real Madrid po përgatitet për një nga ndeshjet më të rëndësishme të sezonit në Champions League, ku në çerekfinale do të përballet me Bayern Munich.

Klubi madrilen ka vendosur që për këtë sfidë të mbyllë çatinë e lëvizshme të stadiumit Santiago Bernabéu, me synimin për të krijuar një atmosferë sa më intensive dhe për të rritur presionin ndaj skuadrës gjermane. Mbyllja e çatisë pritet të amplifikojë akustikën dhe të forcojë ndikimin e tifozëve vendas, veçanërisht gjatë momentit simbolik të himnit të Champions League.

Nga ana tjetër, Bayern Munich nuk e ka pritur mirë këtë vendim dhe ka paraqitur një ankesë pranë UEFA, duke ngritur shqetësime mbi efektin akustik dhe avantazhin e mundshëm që krijohet në një stadium të mbyllur. Megjithatë, rregulloret lejojnë skuadrën pritëse të vendosë për çatinë, përveç rasteve kur kushtet atmosferike e bëjnë të nevojshme ndërhyrjen e delegatit të UEFA-s dhe arbitrit.

Stadiumi pritet të jetë i mbushur plot, me të gjitha biletat e shitura. Rreth 4.000 tifozë bavarezë siguruan vendet e tyre brenda pak orësh, ndërsa në Madrid po përgatitet një koreografi “360 gradë” në ngjyrë të bardhë dhe vjollcë për të mbështetur ekipin vendas.

Në aspektin sportiv, Real Madridi synon të reagojë pas humbjes së fundit ndaj Mallorca dhe të tregojë versionin e tij më të mirë në Europë, ndërsa Bayern Munich vjen me ambicie të qarta për të marrë një rezultat pozitiv në transfertë.