Real Madrid për herë të tretë kërkon Massimiliano Allegrin

Emri i Massimiliano Allegri rikthehet në orbitën e Real Madrid. Sipas raportimeve nga Italia, trajneri aktual i Milanit është një nga kandidatët kryesorë për të marrë drejtimin e “Los Blancos” në verën e ardhshme, kur presidenti Florentino Pérez pritet të hapë një cikël të ri, pas zhgënjimeve me zgjedhjet e fundit teknike.

Nuk është hera e parë që madrilenët interesohen për Allegrin. Tentativa e parë daton në vitin 2019, ndërsa në 2021 palët ishin shumë pranë marrëveshjes. Këtë e ka zbuluar më herët agjenti i tij, Giovanni Branchini.

“Ishte gjithçka e rënë dakord. Nëse do të firmoste, Allegri do të ishte trajneri i Real Madrid. Me dhimbje vendosi të mos nënshkruante. Nuk ishte çështje financiare, por zgjedhje familjare dhe mundësia për t’u rikthyer te Juventusi”, ka rrëfyer Branchini.

Sipas tij, vendimi për të qëndruar në Torino ishte thjesht njerëzor, ndonëse drejtimi i Realit përbënte një ëndërr profesionale.