Reali në momentin më të vështirë, ndaj Atalantës rrezikohet edhe Benzema

Real Madrid po kalon momentin më të vështirë të sezonit, teksa po përballet me mungesa të shumta. Shumë prej tyre mund të mos jenë edhe në sfidën e parë kundër Atalantës në Champions League. Sergio Ramos, Dani Carvajal, Eden Hazard dhe Karim Benzema, të gjithë kanë munguar në seancën e sotme stërvitore.

Tre të parët me siguri nuk do të jenë as në transfertën ndaj bergamaskëve që do të luhet në Itali, ndërkohë që Benzema është në dyshim. Sulmuesi francez po kalon një dëmtim që ka bërë që të jetë në dyshim për sfidën e mesjavës. Nëse Benzema do të mungojë, kush do të shënojë?

Që pas largimit të Cristiano Ronaldos, Benzema ka qenë futbollisti që ka shënuar më shumë gola dhe ka ndihmuar me asist shokët e tij. Shënuesi i dytë pas tij është Casemiro me 5 gola, ndërkohë që më pas vjen Luka Modric me 4. Zidane do të presë deri në momentet e fundit për të vendosur nëse Benzema do të jetë në fushë ose jo. /R.Lika-Koha Jone/