Renditja e FIFA-s, Kosova ngjitet kurse Shqipëria zbret 3 vende

Kosova do të ngjitë 22 shkallë në klasifikimin e FIFA-s në krahasim me muajin e kaluar, falë barazimit historik kundër Finlandës.

Kurse fitorja përballë Maqedonisë duket se nuk i ka shërbyer shumë Kombëtares shqiptare të futbollit e cila parashikohet që në renditjen mujore të FIFA-s të humbasë 3 pozicione.

Shqipëria gjendej në vendin e 37 një muaj më parë, por pikët ndaj Maqedonisë, e cila renditet jashtë 100 skuadrave më të mira (146, -8 pozicione këtë muaj), nuk e kanë ndihmuar për të fituar pozicione.

Përkundrazi, duke i përllogaritur edhe humbjen në tavolinë në miqësoren me Luksemburgun për shkak të kartonit të kuq të Kaçes, kombëtarja humb 3 pozicione dhe zbret në vendin e 40-të.

Ndërkaq, Kosova përllogaritet të hedhë shumë hapa para në renditje, duke lëvizur nga vendi i 190 që mbante në muajin e kaluar, te vendi i 168.