Renditja e FIFA-s për muajin dhjetor, Shqipëria dhe Kosova nuk ndryshojnë pozicion

Shqipëria dhe Kosova qëndrojnë në të njëjtat pozita në renditjen e FIFA-s për muajin dhjetor. Mbyllja e eliminatoreve të Europianit pavarësisht se u shoqërua me rezultate negative si për kuqezinjtë ashtu edhe për dardanët, situata e tyre në renditje mbetet e pandryshuar.

Një muaj më parë kur Shqipëria barazoi 2-2 me Andorrën dhe humbi 2-0 me Francën bëri që kuqezinjtë të zbrisnin  nga vendi i 65-të në vendin e 66-të të renditjes së përgjithshme të FIFA-s, ku më shumë se humbja me kampionët e botës ka ndikuar barazimi dhe golat e pësuar në Elbasan Arena nga Andorra.

Kosova i mbylli eliminatoret me humbjet me Republikën Çeke dhe Anglinë, rezultatet të cilat e zbritën një pozicion në klasifikimin e përgjithshëm duke rrëshkitur në vendin e 115-të nga vendi i 114-të dhe për herë të parë gjatë këtij viti regjistroi një rënie në klasifikim

Renditja e përgjithshme e FIFA-s nuk ka ndryshime në 5 vendet e para të saj, me Belgjikën që vazhdon të kryesojë e ndjekur nga kampionët e botës së Francës dhe ata të Amerikës së Jugut të Brazilit për të vazhduar me Anglinë dhe Uruguain.