Rezultatet e dobëta, Mirel Josa shkarkohet zyrtarisht nga drejtimi i Laçit

Mirel Josa nuk është më trajner i Laçit. Vendimi është bërë i ditur nga vetë klubi kurbinas në faqet zyrtare në rrjetet sociale, teksa fatale ka rezultuar humbja e djeshme ndaj Partizanit, 2-1 në “Elbasan Arena”.

Tekniku kryeqytetas mori drejtimin e kurbinasve më 24 tetor, në javën e 7 të Abissnet Superiores, kur zëvendësoi malazezin Dejan Vukiçeviç dhe i ndërroi menjëherë fytyrën skuadrës, duke e shndërruar në pretendente për titull.

Megjithatë humbja me Tiranën 4-0 në kryeqytet më 26 shkurt, është pasuar me një sërë rezultatesh negative, pasi në 6 ndeshjet e radhës në kampionat, ka marrë 3 humbje e tre barazime.

Kurbinasit fituan sfidën e parë gjysmëfinale të Kupës së Shqipërisë ndaj Teutës dhe janë favorit për të kaluar në finale.