Rikthehet Reali i frikshëm i Zidane, mund me dy super gola Valencian (VIDEO)

Real Madrid mban hapin e Atleticos dhe Barcelonës, duke u ngjitur momentalisht në vendin e dytë në renditje. Skuadra e Zidane mori një fitore të madhe në duelin e vlefshëm për javën e 23-të kundër Valencias, në shifrat 2-0.

Pas një aksioni të rrjedhshëm te Carvajal, topi shkon te Karim Benzema, i cili me një goditje fantastike në hyrje të zonë e dërgon “sferën” në cepin e portës. Asnjë mundësi reagimi për Domenech, i cili me gjithë zgjatjen e kishte të vështirë për ta ndalur.

Los Blancos luajnë më mirë, madje do të arrinin që të realizonin një tjetër gol në fundin e pjesë së parë. Në minutën e 42-të, Vazquez jep një pasim për Toni Kroos në hyrje të zonës. Gjermani nuk mendohet dy herë teksa e dërgon topin në cepin ku edhe shënoi Benzema.

Fraksioni i dytë ishte i thjeshtë për madrilenët për të administruar rezultatin që i jepte shumë qetësi. Valencia dha pak sinjale reagimi duke u pajtuar me një humbje që i çon në kuotën e 24 pikëve, në vendin e 12-të. Në krahun tjetër Reali mori suksesin e tretë radhazi në kampionat, teksa tashmë e sheh veten në kuotën e 49 pikëve, 5 më pak se Atletico, por me avantazhin se ka luajtur dy sfida më shumë se ata. /R.Lika-Koha Jone/