Robert Lewandowski, një “makineri” e pandalshme golash këtë sezon

Sezoni 2019/20 sapo ka nisur, ndërkohë që edhe Champions League ka luajtur vetëm disa ndeshje në fazën e grupeve. Robert Lewandowski mund të cilësohet si futbollisti më në formë në Europë për momentin duke lënë pas yjet e tjerë të futbollit. Sulmuesi polak shënoi dy gola në transfertën ndaj Olympiacos të martën në mbrëmje, duke e ndihmuar ekipin në suksesin 3-2.

Numrat e Lewandowski janë të jashtëzakonshëm, duket qenë vendimtar thuajse në çdo ndeshje. Me Bayernin ai ka shënuar 18 gola në 13 ndeshje, ndërkohë që nëse përfshijmë edhe 4 ndeshjet e kombëtareve, buletini i tij arrin në 21 gola në 17 ndeshje.

Lewandowski nuk ka shënuar vetëm në 4 nga 17 ndeshjet në total, teksa ka shënuar dy tripleta dhe 4 dopieta. Me golat e shënuar në Greqi, polaku ka arritur në kuotën e 58 golave sezonal në Champions League, teksa vetëm Benzema (60), Raul (71), Messi (112) dhe Cristiano Ronaldo (127), kanë shënuar më shumë. Në moshën 31 vjeç Robert Lewandowski nuk di të ndalet duke shënuar gola dhe duke ndihmuar shumë Bayernin. /R.Lika-Koha Jone/