Roma i “rrëmben” Sanchon Juventusit, mungon vetëm miratimi nga lojtari

Trajneri Gian Piero Gasperini ka kërkuar përforcime në repartin e sulmit dhe drejtori sportiv Frederic Massara ka reaguar menjëherë. Në orët e fundit, Roma ka përshpejtuar negociatat për të siguruar shërbimet e Jadon Sancho dhe Leon Bailey, me bisedimet që po ecin me ritme të shpejta.

Marrëveshja me Manchester United për Sancho është arritur: klubi anglez do të përfitojë menjëherë 23 milionë euro. Mbetet vetëm miratimi përfundimtar i vetë lojtarit, i cili prej kohësh ndiqet edhe nga Juventus.

Ndërkohë, edhe Leon Bailey ka dhënë dritën jeshile për transferimin në kryeqytetin italian. Operacioni me Aston Villan pritet të mbyllet në formën e huazimit me të drejtë blerjeje. Kështu, tentativa e Besiktas ka dështuar. Massara dhe ish-drejtori sportiv i Romës, Monchi, janë në kontakte të vazhdueshme për të finalizuar marrëveshjen.

Nëse realizohen të dy transferimet, pritet të ketë lëvizje edhe në dalje: Tommaso Baldanzi dhe Lorenzo Pellegrini mund të largohen. Për ish-mesfushorin e Empolit interesohet Udinese, ndërsa kapiteni verdhekuq është në shënjestër të një klubi të Premier League.