Roma pezullon Drejtorin Sportiv, pati përplasje me presidentin

Gianluca Petrachi është pezulluar nga detyra e Drejtorit Sportiv te skuadra e Romës, edhe pse ka një kontratë dy-vjeçare. Shkak është bërë një përplasje me presidentin e verdhekuqve James Pallotta, ndërsa po me urdhër të këtij të fundit është vendosur pezullimi i përkohshëm i Petrachit dhe detyrat e drejtorit sportiv i ka marrë ish-portieri Morgan De Sanctis.

Pak ditë më parë Petrachi deklaroi se javën e fundit të përgatitjeve nuk kishte parë një angazhim maksimal nga ana e futbollistëve të Romës dhe për këtë arsye trajneri Fonseca e lojtarët reaguan ashpër ndaj tij.

Gjatë ditës së djeshme ishte vetë numri një i klubit kryeqytetas, Pallotta, i cili deklaroi se trajneri Fonseca ka marrëdhënie të shkëlqyera me të gjithë drejtuesit e klubit, por në listën e emrave kishte “harruar” të shënojë atë të Petrachit. Kaq ka mjaftuar që të rinisnin polemikat.