“Ronaldo nuk tërhiqet nga futbolli pa thyer rekordin e golave nga Pele”

Cristiano Ronaldo nuk do të tërhiqet nga futbolli pa thyer rekordin e golave të Pele. Deklarata është bërë nga ish-shoku i tij i skuadrës, Gary Neville, i cili në një prononcim për “Sky Sports”, Neville u shpreh: “Ai është i fiksuar me shënimin e golave, stërvitet çdo ditë për të qenë sa më shumë në formë. Nuk kam asnjë dyshim, do të dojë të luajë deri sa të kalojë rekordin e Pele”.

Sulmuesi portugez mbetet në formë të shkëlqyer, edhe pse tashmë është 35 vjeç. Deri tani ka realizuar 725 gola në karrierën e tij si profesionist, me kombëtaren, Sporting Lisbon, Manchester United, Real Madrid dhe Juventus.

Edhe pse shifra e golave të realizuar nga Pele është vënë shpesh në diskutim, sipas statistikave në Brazil, legjenda e futbollit ka realizuar 1281 gola në 1363 ndeshje.