Ronaldo reagon pas humbjes turpëruese ndaj Fiorentinës: Jemi Juventus, nuk mund ta pranojmë!

Cristiano Ronaldo tentoi mbrëmë me të gjitha mënyrat për të ndihmuar skuadrën që ishte në disavantazh në rezultat por edhe numerik. Pavarësisht përpjekjeve të portugezit, skuadra torineze u mund 0-3. Disa orë pas ndeshjes CR7 ka reaguar me një mesazh në rrjetet sociale, duuke kërkuar reagim nga ekipi pas pushimeve të fundvitit.

“Dje, me një performancë të dobët dhe një rezultat larg të pranueshmes, i mbyllëm ndeshjet tona të planifikuara për 2020-tën. Një vit i veçantë në shumë mënyra të veçanta. Stadiumet bosh, protokollet e COVID, ndeshjet e shtyra, ndalesat e gjata dhe një kalendar shumë i ngjeshur. Por, ky nuk është justifikim për asgjë. E dimë që duhet të japim më shumë nga vetja, për të luajtur më mirë dhe për të fituar në mënyrë më të qëndrueshme.

Ne jemi Juventusi! Dhe ne thjesht nuk mund të pranojmë asgjë më pak sesa përsosmëria në fushë! Shpresoj që kjo ndalesë e shkurtër të na ndihmojë të kthehemi më të fuqishëm dhe më të bashkuar se kurrë, sepse sezoni është akoma i gjatë dhe ne fund besojmë se edhe njëherë do të festojmë me tifozët tanë. Besoni tek ne, besoni ekipin tonë, aq sa ju besojmë. Ne nuk do të dorëzohemi! Deri në fund”, deklaroi portugezi.