Sassuolo ndal në mënyrë spektakolare Juven, Lazio “ngec” sërish (VIDEO)

Juventusi i Sarrit vijon që të shmangë defektet e zakonshme këtë sezon. Kampionët e Italisë barazuan 3-3 ndaj një prej ekipeve më në formë në javët e fundit Sassuolos.

Ndeshja nisi në mënyrën më të mirë për bardhezinjtë që do të shënonin dy gola në 12 minutat e para. Fillimisht Danilo shënoi një gol të bukur me një goditje në hyrje të zonës, ndërkohë që më pas Higuain do të dyfishonte, me të veçantën që të dy golat erdhën nga këmbët e Pjanic.

Sassuolo reagoi mjaft mirë duke i hapur sfidën me një gol të bukur të Djuricic. Në fillimin e fraksionit të dytë, Berardi shënoi nga goditje e dënimit, ndërkohë që tri minuta më pas Caputo kaloi vendasit në avantazh duke shokuar ekipin e Sarrit.

Skuadra torineze do të barazonte me Alex Sandron, që u harrua në zonë nga ekipi i De Zerbit. Pavarësisht përpjekjeve të Juventusit deri në fundin e ndeshjes, nuk do të arrinin që të realizonin një tjetër gol në portën e Consiglit. Lazio ndërkohë nuk shkoi më shumë se një barazim 0-0 kundër Udineses. /R.Lika-Koha Jone/