“Sekretet”  e Liverpoolit të Slot, ja përse janë skuadra më e fortë në Europë

Liverpooli është skuadra më e fortë në Europë, të paktën për momentin. “The Reds” i kanë bërë një nisje spektakolare sezonit nën drejtimin e trajnerit Arne Slot.

17 fitore, një barazim dhe një humbje në 19 ndeshje, janë mëse të mjaftueshme për të zëvendësuar një figurë mitike si Jurgen Klopp. Disfata e vetme këtë sezon ka qenë ndaj Nottingham Forest më 14 shtator.

Për momentin Liverpooli kryeson kampionatin me 8 pikë më shumë se Manchester City, një kundërshtar që do ta sfidojë të dielën. Nga ana tjetër kanë bërë një ecuri rekord në Champions League, me 5 fitore në 5 ndeshje.

Por cilat janë “sekretet” e këtij Liverpooli kaq të frikshëm?

Së pari është trajneri Arne Slot, i cili me shumë qetësi ka ndërtuar një skuadër perfekte. Një strateg i vërtet që ka ndërthur një grup me lojtar të talentuar, por dhe me shumë eksperiencë.

Mbrojtja solide është arsyeja e dytë që “The Reds” janë shumë të vështirë për t’u përballuar. Me Van Dijk në mbrojtje, është e vështirë për të depërtuar, dhe një gjë të tillë e provoi edhe Mbappe në mesjavë.

Kualiteti në sulm, është një tjetër arsye se përse Liverpooli është një ekip që mund të të shkatërrojë. Salah mbetet në formën e tij më të mirë pavarësisht viteve, ndërkohë që Luiz Diaz e Nunez janë të pandalshëm.

Gakpo ndërkohë është një alternativë perfekte në stolin e rezervave. Duke parë këto cilësi dhe vështirësitë që po kalon City, super dueli i fundjavës, i sheh si favorit absolut. /Rozalb Lika/