Semedo flet për goditjet e lira të Messit: Kurrë nuk i praktikonte në stërvitje!

Nelson Semedo ka folur për aftësinë e Lionel Messit në goditjet e lira, duke këmbëngulur se super ylli i Barcelonës nuk praktikohet kurrë në stërvitje me skuadrën në këtë “specialitet”. Saktësia e Messit në këto situata të lojës, gjatë karrierës së tij 16-vjeçare në “Camp Nou”, e ka ndihmuar atë të bëhet golashënuesi më i mirë në historinë e Barçës. I pyetur se si është të stërvitesh me Messin në baza ditore, mbrojtësi luzitan, i cili aktualisht është huazuar te Wolves, dha një intervistë për “The Telegraph”.

“Në të vërtetë nuk kam shumë fjalë, që mund ta përshkruaj sa i mirë është ai. A e dini se çfarë e bën atë edhe më mahnitës? Unë kurrë nuk e kam parë të praktikohet në goditjet e lira gjatë stërvitjes, gjatë gjithë kohës që isha atje. Betohem se nuk e bëri kurrë.

Ne gjithmonë praktikonim gjuajtjet nga distanca, por Messi kurrë nuk u angazhua në një goditje të lirë. Për të, ishte thjesht e natyrshme. Njerëzit thonë se praktika të bën të përsosur. Leo nuk praktikohej në këtë drejtim, por ishte i përsosur!”, deklaroi Semedo.

Messi ka shënuar 658 gola në 763 ndeshje për Barçën, deri më tani, duke përfshirë 49 gola nga goditjet standarde.