Serie A/ Napoli janë kampionët me rritjen të të ulët ekonomike në Evropë

Napoli, kampioni i Serie A, është klubi kombëtar fitues i titullit 2024-25 që ka shënuar rritjen më të ulët ekonomike gjatë dekadës së fundit. Kjo del nga “European Champions Report 2026” i Football Benchmark, i cili analizon performancën financiare të fituesve të tetë ligave kryesore evropiane. Midis viteve 2015-16 dhe 2024-25, të ardhurat operative të Napolit u rritën vetëm me 25%, ndërsa Sporting shënoi +118%, Liverpool +107%, Galatasaray +81%, PSV +79%, Barcelona +60%, PSG +59% dhe Bayern +45%. Në terma absolutë, Barcelona kryeson me gati një miliard euro të ardhura, ndërsa Napoli renditet i gjashti me 179 milionë euro.

Raporti thekson se, megjithëse mungesa e Napolit në Champions League vitin e kaluar ndikoi në humbjen e 30% të të ardhurave, problemi i rritjes është më i thellë dhe prek të gjithë futbollin italian, veçanërisht në krahasim me tendencat ndërkombëtare. Kjo lidhet me vështirësitë e Lega Serie A për të vlerësuar të drejtat televizive. Për Napolin, pagat përbënin 79% të të ardhurave operative në 2024-25, treguesi më i keq mes kampionëve të analizuar, duke reflektuar një menaxhim më të komplikuar.

Megjithatë, falë të ardhurave nga tregu i transferimeve, Napoli arriti të kufizojë humbjen në 21 milionë euro, duke zbutur efektin e mungesës së shpërblimeve të Champions League dhe rritjes së kostove të skuadrës. Klubi i De Laurentiis ka treguar gjithmonë disiplinë buxhetore, duke akumuluar fitime në vitet e mëparshme. Andrea Sartori, CEO i Football Benchmark, thekson se nuk ka një model të vetëm financiar për sukses, por klubet e qëndrueshme kuptojnë kontekstin e tyre ekonomik dhe marrin vendime të disiplinuara për kostot dhe investimet.

Marrë nga La Gazzetta dello Sport