Shehi: Nuk kam frikë asnjë rivalë, ndaj Partizanit si ndeshje e radhës!

Tirana po kalon një moment fantastik në kampionat, teksa numëron tri fitore radhazi në sfidat e fundit. Trajneri i bardhebluve, Orges Shehi në prag të derbit ndaj Partizanit ka hequr presionin ndaj lojtarëve duke theksuar se është një sfidë e zakonshme që vlen 3 pikë. Ai shtoi se futbollistët motivohen vetë para një sfide të tillë.

“Derbi nuk do koment, por ne duhet të fokusohemi dhe të përqendrohemi si ndeshja e radhës. Ka edhe shumë javë të tjera në garë, kështu që do të impenjohemi maksimalisht, por duke e konsideruar si ndeshja e radhës. Statistikat janë pjesë e juaja, unë nuk i trembem asnjë lloj kundërshtari, duke pasur parasysh lojtarët që kam. Do të futemi me synimin për të bërë maksimumin, për t’u ringjitur aty ku duhet dhe aty ku na takon.

Rezultatet pozitive ndikojnë në humorin dhe psikologjinë e skuadrës, por ndeshjet derbi kanë një specifikë të veçantë ku nuk merren parasysh e kaluara dhe e tashmja. Shpresojmë ta interpretojmë mirë dhe të mos gabojmë. Skuadra është e plotë, sigurisht ndonjë lojtar nuk është akoma në 100%. Është derbi, lojtarët do të japin më të mirën e tyre. Patjetër që e analizojmë çdo kundërshtar, por në radhë të parë analizojmë veten tonë, çfarë kemi bërë mirë dhe çfarë keq.

Nuk kam dashur ta ngarkoj skuadrën këtë javë. Trajneri e ka të lehtë motivimin në këtë ndeshje, lojtarët motivohen dhe karikohen vetë. Thjesht duhet të jemi të përqendruar dhe të vlerësojmë çdo detaj, sepse gjërat e vogla kanë shumë rëndësi në ndeshje të tilla. Sa vijnë dhe ndeshjet pakësohen dhe sa vjen dhe ke pas mundësi për të qenë brenda objektiva. Është ndeshje e rëndësishme, luajmë ndaj kundërshtarit tonë historik. Nuk duhet të ngarkohemi, ta marrim si ndeshja e radhës dhe të mos harrojmë se ka edhe shumë ndeshje në garë deri në fund të kampionatit. Është një ndeshje që i ka të tre rezultatet brenda, por ne do të jemi të përqendruar për të marrë maksimumin“, përfundoi Orges Shehi.