Shitja e aksioneve të Vllaznisë, Voltana Ademi tregon vlerën fillestare

Vllaznia do të dalë në shitje për vlerën fillestare të 60 milionë lekëve të rinj. Shitja e aksioneve të klubit shkodran të futbollit do të bëhet me ankand të hapur, në të cilin mund të marrin pjesë gjithë të interesuarit. Lajmi është konfirmuar nga kryetarja e bashkisë së Shkodrës Voltana Ademi, që ka sqaruar edhe procedurat.

“Para një jave, ne kemi marrë nga Ministria e Arsimit dhe Sportit një letër që referon për zbatim ndryshimet ligjore të fundit të Ligjit për Sportin. U kërkohet institucioneve që administrojnë klube futbolli të kryejnë procesin e shitjes. Ka një ndryshim mes privatizimit dhe shitjes. Me ardhjen e këtij dokumentacioni ne kemi qenë të gatshëm. Bilancet janë gati, kemi relacionin dhe projektvendimin për shitjen e klubit Vllaznia, 100 për qind, sikurse ligji e thotë. Kemi pasur diskutime, por tani, me daljen e ligjit është detyrim. Do ketë një ankand të hapur dhe do të donim të merrnin pjesë jo vetëm ata që janë të interesuar sot, por edhe ata që kanë investuar në të shkuarën, apo kanë reklamuar.

Kjo është e rëndësishme të theksohet, pasi u duhet dhënë mundësia të gjithëve të konkurrojnë. Do bëjmë të mundur që të kemi një procedurë transparente. Sot publikohet në faqen e Bashkisë Shkodër njoftimi për konsultim publik. 60 milionë lekë të reja është çmimi fillestar, por vlera më e saktë gjendet në raport. Kuptohet që kjo është vlera më e ulët, pastaj gjithë të tjerët mund të shprehin interesin e tyre”, deklaroi Voltana Ademi.