Shqipëria nis sot aventurën në “Wembley”, Duka: Me besim mund të realizojmë një ëndërr!

Shqipëria sot nis aventurën për eliminatoret e Botërorit 2026 në një duel emocionues ndaj Anglisë në “Wembley”. Presidenti i FSHF, Armand Duka, nëpërmjet një postimi në profilin e tij zyrtar në “Facebook” ka uruar ekipin, teksa ka theksuar se me besimin e duhur, ëndrra për ta parë Shqipërinë në Botëror mund të realizohet.

“Nisim sot një tjetër sfidë, me besimin se mund të realizojmë një ëndërr!

Përballë kemi kundërshtarë të vështirë, duke nisur nga Anglia me të cilën ndeshemi sot në “Wembley”. Gjithsesi kjo nuk duhet të na zbrapsë, por të na motivojë, të na bëjë bashkë, të përpiqemi dhe të vazhdojmë të jemi frymëzues për shqiptarët kudo që jetojnë.

Kombëtarja jonë ka gjithashtu lojtarë të mirë, Kombëtarja jonë ka cilësi, Kombëtarja jonë ka zemër, shpirt dhe do të japë maksimumin në fushën e lojës.

Në fund mund të bëjmë atë që nuk e kemi bërë asnjëherë, të shkojmë në një Kampionat Botëror. Me besim, këmbëngulje, duke qenë një trup i vetëm, lojtarë, staf e tifozë, gjithçka është e mundur!”, shkruan Duka.