Shqiptarët pritet të “pushtojnë” Wembley-in, shiten të gjitha biletat

Dueli mes Anglisë dhe Shqipërisë do të luhet në praninë e 90 mijë tifozëve. Federata angleze njoftoi shitjen e të gjithë biletave në Wembley, duke bërë që sfida e fundit kualifikuese e “Tre Luanëve” në shtëpi të luhet në një atmosferë fantastike.

Tifozët kuqezi pritet të jenë të shumtë në numër. Kombëtarja kërkon të marrë një rezultat historik në Londër, i cili do të mbante gjallë edhe shpresat për vendin e dytë në grup dhe mundësinë e një bilete për në fazën play-off të Botërorit 2022 në Katar.

Shqipëria nuk ka shënuar asnjë gol në fushën e Anglisë dhe janë mposhtur 5-0 në ndeshjen e fundit të luajtur në Wembley, në vitin 1989. Kuqezinjtë do të kërkojnë të ndryshojnë historinë, ashtu si ndodhi me Hungarinë.