Slot: Jemi në progres, Salah e kam gjithnjë në mendje

Në konferencën për shtyp para sfidës së radhës në kampionat, trajneri i Liverpoolit, Arne Slot, ka analizuar formën e skuadrës dhe progresin e bërë pas rezultateve të fundit, duke theksuar se ekipi po lë pas periudhën e luhatjeve.

Slot kujtoi se katër pikët e marra në dy ndeshjet e fundit kanë një peshë të veçantë, sidomos pas dy humbjeve në Anfield ku skuadra pësoi shtatë gola: “Jemi larguar vetëm një devijim nga mbajtja e dy porteve të paprekura. West Ham nuk shënoi në të vetmen rast të krijuar, ndërsa goli i Sunderland nuk ishte një mundësi e mirëfilltë. Kjo tregon progres. Nuk kemi pësuar nga goditjet e dënimit, dhe kjo është shumë e rëndësishme për stabilitetin tonë”, theksoi ai.

Trajneri holandez u ndal edhe te lojtarët e ardhur gjatë verës, duke i cilësuar si një shtysë të rëndësishme për rikthimin e besimit brenda grupit: “Lojtarët e rinj kanë sjellë energji. Florian Wirtz është shembulli më i dukshëm, por edhe Kerkez ka kontribuar, ndërsa Isak shënoi golin e tij të parë. Ka elementë pozitivë, megjithëse nuk jemi ende në pikën që synojmë. Por krahasuar me humbjet, situata është më optimiste.”

Sa i përket Mohamed Salah, Slot u shpreh se egjiptiani mbetet thelbësor në planet e tij, pavarësisht debatit të fundit lidhur me aktivizimin ose jo të tij: “Çdo lojtar është në mendimet e mia për të nisur ndeshjen, dhe Mo është i jashtëzakonshëm për ne. E kuptoj diskutimin kur nuk luan, sepse ka qenë vendimtar për gjashtë apo shtatë vite. Është normale që njerëzit të reagojnë kur mungon.”