Sot ose vdisni në fushë ose fitoni … na thërret Botërori

Mbrëmja e sotme nuk është e zakonshme për Kombëtaren tonë. Është një betejë që mban peshën e një ëndrre të madhe,  kualifikimin në Kupën e Botës. Përballë qëndron Polonia, një kundërshtar me emër, eksperiencë dhe potencial financiar më të madh, por jo i pathyeshëm.

“Në mars do të vdesim në fushë për të marrë fitore dhe për të shkruar në Botëror”, në fakt nuk janë fjalët e Sylvinhos para ndeshjes, por të trajnerit të Kosovës, Foda, i cili 4 muaj më parë dha këtë deklaratë që na shkon përshtat edhe ne. Si strategu i Kosovës, edhe për ne duhet të jetë i njëjti mentalitet, të kalojmë fillimisht hapin e parë drejt Botërorit.

Kuqezinjtë me mungesa, por me grup solid

Nuk vijmë ndoshta në momentin tonë më të mirë, me mungesa të rëndësishme si Rey Manaj, Daku apo edhe Medon Berisha, gjithsesi elementët nuk na mungojnë.  Kombëtarja shqiptare vjen në këtë përballje me një frymë të re dhe një grup lojtarësh që kanë fituar eksperiencë në kampionate të rëndësishme europiane. Emra si Kristjan Asllani, Ernest Muçi dhe Anis Mehmeti përfaqësojnë një brez që nuk ka frikë nga emrat e mëdhenj.

Disiplina taktike dhe loja në grup janë armët kryesore të kësaj skuadre të ndërtuar prej 3 vitesh nga Sylvinho, i cili po bën një punë fantastike.  Megjithatë, sfida më e madhe mbetet mungesa e thellësisë në stol. Ndryshe nga kundërshtarët, Shqipëria nuk ka të njëjtin luks rotacioni, çka do të thotë se çdo lojtar në fushë duhet të japë maksimumin pa luhatje.

Rivalët me cilësi, por nën presion

Nga ana tjetër, Polonia vjen me statusin e favoritit. Skuadra ka një përbërje të mbushur me lojtarë që aktivizohen në ligat më të forta të Europës. Në mbrojtje spikat Jakub Kiëior, ndërsa në krahë dhe mesfushë emra si Matty Cash i japin rendiment mesufshës. Pika e dobët ndoshta është në sulm, Leëandoëski (38 vjeç) nuk ka më atë freskinë e dikurshme, ndërkohë që emrat e tjerë luajnë pak.  Për polakët statusi i favoritet mund të kthehet në presion. Çdo rezultat tjetër përveç fitores do të konsiderohej dështim, dhe kjo mund të ndikojë në qetësinë e tyre gjatë lojës.

Formacioni i mundshëm në Varshavë

Sylvinho ka pasur 3 ditë në dispozicion për të përgatitur skuadrën dhe pritet që në takimin e sotëm, të bëjë surpriza në formacion, sidomos në repartin e sulmit aty ku mungesat janë më të mëdha. Kështu, porta do t’i besohet sërish Thoma Strakoshës, i cili do të ketë para 4 mbrojtës.

Në të majtë, do të luajë Mario Mitaj, ndërkohë që në të djathtë hapësirë do të ketë edhe për Elseid Hysajn. Qendra e mbrojtjes do t’i besohet sërish dyshes Berat Gjimshiti dhe Arlind Ajeti.

Në mesfushë, Asllani dhe Shehu janë titullarë të padiskutueshëm, ndërkohë pritet të konfirmohet edhe Qazim Laçi. Në të djathtë të sulmit, do të jetë Myrto Uzuni ndërsa në të majtë do të jetë Arbër Hoxha. Në qendër të sulmit, pritet të jetë Bajrami si “9-sh fals”, por gjatë ndeshjes mund të alternohet edhe me Uzunin.

Dueli taktik, ku mund të vendoset ndeshja?

Kjo përballje pritet të jetë një luftë taktike. Shqipëria ka gjasa të mbështetet në një strukturë kompakte, duke mbyllur hapësirat dhe duke kërkuar kundërsulmin. Çelësi do të jetë menaxhimi i mesfushës dhe aftësia për të ndalur ritmin e polakëve. Polonia, në anën tjetër, do të kërkojë të kontrollojë topin dhe të imponojë ritmin e saj. Lëvizjet në krahë dhe goditjet nga distanca mund të jenë armët kryesore të tyre, ndërkohë që ne duhet të provojmë te befasojmë me kundërsulme të shpejta, ashtu si ndaj Serbisë.

Në letër, diferencat janë të dukshme, si në vlerë tregu, ashtu edhe në eksperiencë. Por futbolli nuk luhet me shifra. Ai luhet me zemër, me sakrificë dhe me besim. Për Shqipërinë, kjo është një mundësi për të shkruar histori. Një fitore do të ishte jo vetëm një hap drejt Botërorit, por edhe një mesazh i fortë se kjo skuadër është gati të sfidojë çdo barrierë. Në fund, gjithçka do të vendoset në fushë. Dhe nëse ka një gjë që kjo kombëtare ka treguar, është se di të luftojë deri në sekondën e fundit. Sonte, nuk është vetëm një ndeshje. Është një betejë për krenari, për ëndërr dhe për histori. /Rozalb Lika-Koha Jonë/