SPECIALE/ Nga Messi te Dzeko, ja “bombat” që nuk shpërthyen në merkato

Merkato e verës së vitit 2020 u mbyllë me disa transferime të rëndësishme, por disa tratativa nuk shkuan deri në fund. Edhe pse zgjatën thuajse me muaj të tërë sërish nuk u arrit që të kompletoheshin për çështje burokratike, apo zgjedhje të klubeve.

Dzeko (Roma): Chelsea, Inter dhe Juventus e kërkuan me ngulm boshnjakun, por ai sërish qëndroi të verdhekuqtë. Edhe pse ishte i preferuari i Pirlos për sulmin bardhezi, dështimi i kalimit të Milik të Roma bëri që lëvizja e tij të bllokohej.

Milik (Napoli): Fillimisht u përfol për një transferim të Juventusi, por më pas pista e Romës u bë shumë më konkrete. Gjithsesi disa probleme me të drejtat e imazhit të tij bën që kalimi në kryeqytetin italian të dështonte. Fiorentina dhe Valencia tentuan deri në fund, por Napoli nuk hoqi dorë nga kërkesat e saj të ekzagjeruar.

Suarez: Çështja e tij është e veçantë, pasi përfundoi edhe në kronikat që nuk kanë lidhje me futbollin për shkak të shtetësisë italiane. Juventusi e ëndërroi prej javësh, por koha ishte e pamjaftueshme për marrjen e pasaportës, ndaj dhe në fund u transferua te Atletico Madrid.

Lautaro Martinez (Inter): Që nga janari përflitej për një aventurë të re te Barcelona, por një gjë e tillë nuk ndodhi. Çështja Messi, problemet ekonomike si dhe fakti që Koeman nuk është se e kishte në krye të listës së dëshirave, bëri që kjo lëvizje të mos bëhej gjatë verës.

Koulibaly (Napoli): Gattuso shpresonte që deri në fund të merkatos të mos vinte një ofertë që mund të tundonte De Laurenttis. Transferimi te Manchester City apo PSG dukej pranë, por asnjë prej tyre nuk plotësoi kërkesat e presidentit të Napolit.

Messi (Barcelona): Bota blaugrana përjetoi ditë frike dhe ankthi gjatë verës, pasi Leo dëshironte që të largohej me kosto zero nga katalanasit. Manchester City dukej se ishte shumë pranë argjentinasit, por në fund klubi i Barcelonës nuk hoqi dorë nga kontrata duke detyruar “Pleshtin” të bënte një hap pas.

Aouar (Lyon): Fillimisht u cilësua si një futbollist i Juventusit në ditët e para të merkatos, pas një marrëveshje verbale mes klubeve, por më pas bardhezinjtë hoqën dorë për të paguar 50 milionë euro. Arsenali prej javësh tentoi të bindte presindetin e Lyon-it me disa oferta por asnjëra prej tyre nuk ishte e duhura. Mëkat që nuk do ta shohim në një klub me të madh në sezonin e ri.

Depay (Lyon): Dukej shumë pranë një kalimi te Barcelona e Koeman, në trajner që i di mjaft mirë aftësitë e tij, por një gjë e tillë nuk ndodhi. Barcelona nuk pranoi të paguante 25 milionë euro, ndoshta e ndikuar dhe nga forma fantastike e Coutinhos dhe Ansu Fati. /Rozalb Lika-Koha Jone/