Strakosha refuzon rinovimin, mendon për largimin nga Lazio në verë

E ardhmja e Thomas Strakoshës mund të jetë larg Lazios. Sipas asaj që shkruan e përditshmja “Il Messaggero”, skadenca e kontratës të portierit të Kombëtares është në qershor të vitit 2022. Portieri i Kombëtares sonë nuk ka më dëshirë të rinovojë kontratën e tij me kryeqytetasit.

Me shitjen e tij, Lazio pritet të ketë një plusvalecë të madhe duke e parë se e bleu për një shifër prej 75 mijë eurosh nga Panioniosi. Duke parë se aktualisht portieri 25-vjeçar është një zgjedhje e dytë e trajnerit Simone Inzaghi, vlera e 30 milionë eurove të kartonit të tij duket e ekzagjeruar, ndaj dhe kjo shifër mund të ulet. Dortmundi mund të jetë destinacioni më i mundshëm, por nuk përjashtohet as një kalim në Premier League.