Sulmuesi serb: Na pret atmosferë e zjarrtë në Tiranë, por jemi gati

Në prag të sfidës mes Shqipërisë dhe Serbisë, e cila do të luhet më 7 qershor në “Arena Kombëtare” në Tiranë, sulmuesi serb Aleksandar Katai ka folur për pritshmëritë e tij për këtë ndeshje të rëndësishme, e vlefshme për kualifikueset e Kupës së Botës.

Në një intervistë për faqen zyrtare të Federatës Serbe të Futbollit, Katai ka theksuar se skuadra është e përgatitur për një atmosferë të zjarrtë dhe nuk trembet nga presioni i tifozëve shqiptarë.

“Na pret një atmosferë e nxehtë, por përmes shumë dueleve me klubet tona, në Champions League dhe në Ligën e Evropës, jemi mësuar me situata të tilla. Kjo nuk na ndikon në asnjë mënyrë,” – tha ai.

Sipas tij, një ndeshje me një atmosferë të tillë është më e mirë se sa të luhet pa tifozë: “Përkundrazi, çdo lojtar gjen motivim në një ambient të tillë. Është një duel ideal për t’u dëshmuar.”

Ndeshja pritet të jetë e tensionuar dhe me shumë interes, duke pasur parasysh historinë mes dy përfaqësueseve, por gjithashtu edhe rëndësinë që ka për pozitat në grupin kualifikues.