Tare elozhe për Allegrin: Sjell mentalitet fitues, po punojmë për Jasharin

Sot në “Casa Milan” është zyrtarizuar nisja e epokës së re për kuqezinjtë. Trajneri Massimiliano Allegri dhe drejtori i ri sportiv Igli Tare janë prezantuar zyrtarisht përpara mediave, duke dhënë sinjalin e nisjes së sezonit 2025/2026.

Gjatë konferencës për shtyp, Tare falënderoi trajnerin dhe stafin e tij për pranimin e këtij projekti të ri: “Faleminderit Allegrit dhe stafit të tij për nisjen e kësaj aventure të re. Ai ishte një zgjedhje që u mbështet menjëherë nga klubi. Në të kemi parë një figurë me përvojë dhe mentalitet fitues.”

Sa i përket merkatos, drejtori sportiv u ndal te objektivi kryesor i momentit, mesfushori Ardon Jashari: “Po punojmë për Jasharin. Duam shumë që ai të vijë te Milani, por duhet të respektojmë situatën kontraktuale me Club Brugge. Kemi bërë një ofertë të rëndësishme që reflekton vlerën e lojtarit dhe të klubeve. Shpresoj që kjo çështje të përfundojë në mënyrën më të mirë, si për Milanin, ashtu edhe për vetë lojtarin.”