Thiago merr miratimin nga Bayerni, nis negociatat me Liverpoolin

Thiago Alcantara është gjithmonë e më pranë largimit nga Bayerni për të nisur një aventurë të re te Liverpooli. Futbollisti 29-vjeçar i ka shprehur dëshirën e tij për t’u larguar edhe trajnerit të kampionëve gjermanë, Hansi Flick, i cili nga ana e tij ka dhënë miratimin për nisjen e negociatave për realizimin e transferimit.

Klopp e pëlqen shumë futbollistin spanjoll dhe është gati të paguajë rreth 35 milionë euro për kartonin e tij, aq sa kërkon edhe Bayerni i Mynhut. I rritur në akademinë e Barcelonës, mesfushori me origjinë braziliane debutoi te katalanët në vitin 2009 dhe qëndroi aty për 4 sezone, ku arriti të aktivizohet për 101 ndeshje në të gjithë kompeticionet dhe të shënojë 11 gola.

Më pas iu bashkua Bayernit të Mynihut, ku luan prej 7 sezonesh dhe është shpallur po kaq herë kampion i Gjermanisë, ndërsa ka fituar edhe një herë Ligën e Kampionëve. Me bavarezët Alcantara numëron 232 ndeshje dhe 31 gola të shënuar.