Tirana fiton me lehtësi ndaj Kastriotit, Dinamo pëson tjetër humbje ndaj Teutës

Tirana merr fitoren e dytë radhazi në Abissnet Superiore duke mundur pastër 3-0 Kastriotin. Bardheblutë ishin në udhëheqje të ndeshjes gjatë gjithë kohës dhe nuk e vendosën për asnjë moment në diskutim trepikëshin.  Taulant Seferi zhbllokoi shifrat në minutën e 21-të. Sulmuesi u tregua i saktë në hyrje të zonës dhe nuk i la mundësi reagimi portierit Sali. Sulmuesi nga Kumanova u tregua i ftohtë dhe shënoi të dytin për të tijtë në minutën e 45.

Gjithsesi, për të vendosur pikët në kasafortë, mendoi Michael Ngoo, i cili këtë herë u shërbye nga Seferi në minutën e 74 dhe përballë Salit nuk e pati të vështirë për të shënuar. Bardheblutë marrin fitoren e dytë radhazi duke ruajtur vendin e parë të klasifikimit me 27 pikë, ndërsa nga ana tjetër, Kastrioti zhytet në fund me vetëm 5 pikë të grumbulluara pas 12 javëve kampionat.

Dinamo pëson një tjetër humbje në Superiore, këtë herë në shifrat 0-1 ndaj Teutës. Këtë herë protagonist për keq u bë portieri Bakaj. Gardiani bëri një grushtim katastrofal në fillim të pjesës së dytë dhe devijoi në rrjetë një krosim të ardhur nga këndi, duke u dhënë suksesin durrsakëve. Kjo ishte fitorja e parë e Renato Arapit si trajner, ndërkohë që Dinamo merr humbjen e dytë radhazi dhe tregon se është ende shumë larg pritshmërive.