”Topi i Artë”, trofeun e merr 22-vjeçari Arinaldo Rrapaj: Është një emocion shumë i veçantë

Futbollisti i Partizanit, 22-vjeçari nga Kavaja Arinaldo Rrapaj është fituesi i ”Topit të Artë” për vitin 2023.  Ai arriti të fitonte titullin kampion me të kuqtë edicionin e shkuar, duke qenë një nga elementët më të rëndësishëm. Sezonin e kaluar, Rrapaj shënoi 6 gola në kampionat, ndërkohë që 2 herë e ka gjetur rrjetën dhe këtë sezon.

22-vjeçari është një nga lojtarët më të dalluar dhe më premtues të Partizanit, por dhe të kampionatit shqiptar. Një vlerësim i merituar për Rrapajn, i cili e mori këtë çmim pas votave të trajnerëve dhe kapitenëve të skuadrave të Superiores.

“Për mua është një emocion shumë i veçantë. Dua të falënderoj FSHF-në dhe njerëzit që kanë votuar për mua. Falënderoj Partizanin, presidentin Demi dhe shokët e ekipit. Pa të cilët nuk do të isha këtu sot. Falënderoj sidomos familjen time, që më ka qëndruar pranë në çdo moment”, deklaroi Rrapaj.